Thursday, September 25, 2014

NA VUCU NI VANUA - NA BOSE NI NODA GAUNA NA KAWA I TAUKEI

Oqo e dua nai talanoa ni dua na Parofisai ka kunekunetaki ena yabaki 1920 ena dua na nodra bose na Vu kei Viti ka vakayacori mai Bua. O Bua na nodra vale ni bose na Vu kei Viti ka davo koto ena babaceva ni vanua o Nakauvadra. E tarava tu yani na koro e rua, o Navunisea kei Nabalabala ena vanua o Tokaimalo, Tikina o Saivou ena loma ni Yasana o Ra.

1. Na bose oqo era a mai navuca kina na kena taqomaki na noda i yau na Kawa I Taukei e Viti ni ra sa mai via kovea tiko na vulagi, kei na kena via laki kau mai na kato ni cakamana ni a maroroi sara tu mai na wai cevata.
Nai talanoa oqo e ra veisola koto kina na kena Serekali mei vakadei kai vakadinadina ni Parofisai dina oqo. Ia na kena vakayacori se kena vakavotukanataki ena qai tukuna ga mai ko Gauna ni sa donu ka mau mai vua na Kalou levu ko Jiova.

Na bose oqo e dolavi ena dua na uneune ka kuretaki Viti na kena kaukauwa ka me kila o vuravura taucoko na dolavi ni nodra bose na Turaga Bale na Vu kei Viti ka vaka koto oqo na kena serekali:
ME LUTU NA UNEUNE NI VANUA
BASIKA TU O LUTUNIGAUNA
NA LUVEDRA TU NA SALU MAI BUA
MAI YADRAVA NA BOSE MAI ULUDA
I KA RUA O COVERENIKOULA
I KARUA O COVERENIKOULA
NA OVISA LEVU NI NODA VANUA
NA TAMANA O BOLANAVURAVURA
GANEI ADI SOVANATABUA
YADRA TIKO E MATANIKATUBA
NA LEWA NI BOSE KA SA VESUKA
NA KENA LAWA NA ‘MATE KEI NA BULA’
NI MAI ROGOCA ME TUKUNI YANI
NOQU CAKACAKA SA DREGATI
BOSE NI GAUNA ME MAI DOLAVI
SA TABU SARA NI LAUSAQATI
ME LAVETI TU KO VITI AILADI
LUTU DROMU TU NI VUQA NA YABAKI
NI RA BUTURAKA TU NA KAITANI
2. Na dolavi ni bose oqo era tiko kece kina na Vu kei Viti, e rau bau tiko tale ga kina na turaga veitacini oya oi rau na Ciri, qai bera mai e dua na marama levu ka tinadra na koula kece kei vuravura. Sa mani lewai me rube na bose me rua na siga, ka me waraki na marama levu oqo ko Tinanikoula.
KEIMAMI SA TIKO MAI BUA
KEI IRA KECE NA VU NI VANUA
KA SA DOLA NA BOSE NI GAUNA
RAU TIKO KINA NA TURAGA RUA
SA YALI TU O TINANIKOULA
VAKARUBE NA BOSE KA SIGA RUA
NA LEWA NEI KOYA NA MATUA
SA VURA TU O TINANIKOULA
NA MARAMA SAU NI NODA VANUA
NA WA NI BIUKILA E YALUMA
E VAKATAGIA VAKAMALUA
VAKAROKOROKO NA SIGA NIKUA
KA TEKI CUVA NA VU NI VANUA
3. E mani vosa na Turaga nai Liuliu levu kei Viti ko Ratu Waicalanavanua ka tamadrau na Ciri. E ra mani kaya tiko ni sa matua na koula kei Viti, ia me ra vakagalalataki mada na vulagi e ra mai qara bisinisi tiko e Viti, ka ni sai ira ga oqo na dau veivakaisini.
NA TUI KO WAICALA KA TUKUNA
KO I AU NA BOSO NI NODA VANUA
NA NOQU VOSA E LUTU VAKAUMA
NA DELAI VITI KA SA LUTUKA
AU MANI VUKICA NA KENA GAUNA
OSODRIGI TU NA UMA NI KOULA
I RAGONE ME KUA NA VAKASUKA
ME TUKI NA KISI NA SIGA NIKUA
VAKARAUBUKA LIMA NA MINITI (2000 COUP)
VOSA CAKE TU KO NAITINI (Ilikimi Naitini)-George Speight
ME RUBE MADA NA BOSE KEI VITI
AU MANI VODOKA NA LAWA VIRIKI
I KARUA NA SEKODI MINITI
AU MANI SOLIA NODRA NOTISI
ME RA TOKITAKI NA TIKO E VITI
VULAGI KECE ME TOKI LAIVI
ME 
SOGOTI KECE NODRA BISINISI

NI RA SOGOTA NA LEWA KEI VITI
ME DA LUTU SOBU ME NODRA NA WINI
4. Sa mani rivarivabitaki de yaco e dua nai valu vei ira na kawa bula kei Viti. Sa mani kaya o Ratu Waicalanavanua me ra mai vakatarogi se o cei ena rawa ni vala ena vukuda na kawa bula kei Viti raraba. Rau mani bole e rua na turaga dau vala o Tuirevurevu na qaqa mai Narokorokoyawa, e bolea me nona duadua ga na vala ena vanua mamaca kei na maliwa lala.

Na kena I karua ko Misijiale Komaiwai ka yacana kilai levu tu me ko Dakuwaqa. Sa nona duadua ga na vala ena loma ni wasawasa.
TALANOA NI GAUNA SOGOTUBU MADA
ME RA BOSEVATA NA VU MAKAWA
NA VOSA NI BOLE RA SA CAKAVA
ME RA BOLE I MATAI WAICALA
BOLE CAKE E DUA NA TURAGA
TUIREVUREVU DINA QORI NA YACANA
NOQU KORO O NAROKOROKOYAWA
LAIONE NI VANUA MAMACA
IKELI VUKA I NA MACAWA
VEI KA KECE AU DAU CATAKA
BOLE TALE E DUA NA TURAGA
NA YACAQU O I AU O DAKUWAQA
NOQU TIKO NA LOMA NI WASAWASA
VEI KA KECE AU DAU SAGATA
NA MELISITIMA NA MANUWA
NA SAMARINI BAU VATA KAYA
AU TILOMA BULABULA NA TAMATA
NA KAUKAMEA AU QURULAKA
NI MAI ROGOCA NI VAKASARAVA
AU SA CICI KA KUSA RAWA
QIQI NI VALU AU TABELAKA
AU TAURA KAU VOROVOROLAKA
SAU NEI TAMAQU KAU BOLETAKA
AU KILA NA KALOU DINA SARA
NA TAMATA KECE AU TAWA OKATA
VODI VEI AU NA UMA VARASA
5. E ra sa mani lomavata me sa dolavi na mana kei Viti. E rau sa mani tarogi na Ciri. Sa e vei na kato ni cakamana kei Viti? E rau mani kaya ni rau vakalutuma sara tu mai na wai cevata. Sa mani kaya vei rau ko Waicalanavanua, “Drau rogoca na nodra lewa ni bose na Vu kei Viti. Mo drau laki kauta mai na kato ni cakamana ena kena gauna totolo duadua ka me mai dolavi na veivakatorocaketaki vei ira na kawa bula kei Viti. Ke sega, drau na totogi mate”. Rau sa loma leqa na Ciri se o cei me na vukei rau e na cakacaka dredre oqo, ka ni yadravi tiko na kato ni cakamana e na ligadra na sotia qaqa mai na wai cevata. Rau sa mani vaqara e dua na turaga me vukei rau e na cakacaka dredre ka vakarisiate oqo. Rau sa mani gole ki Nailega mai Wainibuka me rau laki kerea na qase mai Nailega.
NA TAMATA VUKU E RA VAQAQARA
E RA VUKA I LOMANI MACAWA
RA NUNUVA NA LOMANI WASAWASA
RA VAQARA VOLI NA KATO NI CAKAMANA
E RA YADRAVA NA BOGI KA SIGAVAKA
KA RA SEGA SEGA SARA NI KUNEA RAWA
NA WAQA NI KATO SA KUNE RAWA
NI KASA KOTO MAI NA BOTO NI TOBABASAGA
ME KUA NA IKA E NA WASAWASA
SE MANUMANU E NA VANUA MAMACA
ME SESE KINA NA NODRA VAKASAMA
Oqori ga na waqa lala ni kato ni cakamana. Na yacana o Diliwanivalu, e qase ulucou ka se sucu kaya ga mai na nona cou. E turaga qaqa ka dau tu taudua voli ga. E Turaga Sau ka dau cakamana tale ga. Na sau kei na mana tiko vua ni sili mai Nailega e suka cake na Wainibuka ka laki luvu sara kina o Nakauvadra.

Rau sa mani vakasavuya vakavanua na nodrau kerekere, ka sa mani vakadonuya na qase mai Nailega. Me laki waraki koya ko Dakuwaqa mai Yasawa me yadrava tiko na yasa ni wasawasa koya.

Sa mani gole cake ki Igiladi na qase mai Nailega ka vodoka cake e dua na manuwa lailai na yacana na Senirosi. Na manuwa oqo e manuwa mai Natobabasaga e na baravi kei Nakorotubu e na yasana ko Ra. E rua ga na siga na soko ni manuwa oqo sa kele mai Lodoni, sobu ki vanua na qase mai Nailega ka vukici koya me vaka e dua na gone yalewa yabaki tinikawalu. Sa mani gole cake vua na Tui ko Kinijioji ka kerea na luvena yalewa me laki vakadinadinataka na nona I lakolako kina Saucapole. Sa mani sainitaka na nona I vola ni curu vanua, ka biuti Lodoni e na walu na kaloko ena mataka lailai, gole kina wai cevata, taura na kato ni cakamana ka gole lesu mai ki Viti. Qai dromu na siga sa rau sota kei Dakuwaqa mai Yasawa.
BIUTA NA WAVU NA SENIROSI
SAQA NA MUA O LODONI
LODONI AU TIKO VOLI KINA
KINIJIOJI AU VIA RAICA
NA LUVENA ME NOQU VAKADINADINA
BIUTI LODONI ENA WALU
NA WAI CEVATA SA KABUKABU
AU SAGA VOROKA NA WAI CEVATA
AU TAURA NA KATO NI CAKAMANA
AU BIUTA I LOMA NI NOQU WAQA
AU SOLIA KECE NOQU KATAKATA
DROMU NA SIGA MAI YASAWA
TIKO KINA NA VUKE YADRA
NI MAI ROGO NI VAKASARAVA
O AU NA TAGANE NI LOMA NI WASAWASA
O CEI TALE E MAI VIA VALA
MEU BIUTA RUARUA I TUBA NA YALOKA NI MATANA
IRA NA MIMIRA NA NONA GACAGACA
6. Sa kau kina vale ni bose mai Bua na kato ni cakamana. Sa qai vakacirimi na kena waqa. E ra biliga tu mai na qio vakaitamera, dua na wase e ra qio loaloa, ka dua nai wase e ra qio vulavula. E ra qai veidretaka tiko na waqa lala oqo, e dua nai to na qio loa ka dua nai to na qio vula.

Ni ra donumaka na gusu ni Tobabasaga, era sa guce na qio vulavula, e ra sa qai biliga kina loma ni Tobabasaga na qio loaloa na waqa lala koya. Ni vo sara ga e lima na kalawa me kasa na waqa, rau qai basika mai e rua na qio katukatu ya tini. Dua e ka loaloa ka dua e ka vulavula, rau qai tabaka na vala. E tubu na ualoka ena loma ni Tobabasaga ka rauta na 20 na fiti na tubu ni wai ena loma ni macawa me yacova sara ga ni sa laki gogo na qio vulavula ka sa mani dro yani.

Sa qai kasa ena boto ni Tobabasaga, na ka e vaka nai rairai ni dua na kisi oqo, e 12 na fiti sukuwea na raba kei na kena balavu. Ni da raica e da sega ni kila se cava oya. E kaukauwa me vaka na kaukamea, e boi sigasiga sara mai vua na ika, ia e qai seyavu tiko yani vakamalua me vaka na sovu ka qai laki waicala vakadua ni oti e tolu na vula.
NA TAMATA VUKU ERA VAQAQARA
E RA VUKA E LOMA NI MACAWA
RA NUNUVA ENA LOMA NI WASAWASA
RA VAQARA VOLI NA KATO NI CAKAMANA
E RA YADRAVA NA BOGI KA SIGA VAKA
KA RA SEGA SEGA SARA NI KUNEA RAWA
NA WAQA NI KATO SA KUNE RAWA
NI KASA KOTO MAI NA BOTO NI TOBABASAGA
ME KUA NA IKA ENA WASAWASA
SE MANUMANU YAVA I VA E VANUA MAMACA
ME SESE KINA NODRA VAKASAMA
OQORI GA NA WAQA LALA NI KATO NI CAKAMANA
7. Ni oti na bose sa qai tekivu me vakauta na vunivola levu ni bose nai tukutuku matailalai ni veika kece sara sa tuvalaki tu me na qai vakayacori e Viti. Ka sa vakadeitaki me sa na dolavi na gauna kei Viti, oya me sana ka cecere duadua e Viti nai vakarau ni bula vakavanua vakaitaukei.

Na vakarautaki ni kena bula vaka I lavo, ia me ra na qai vude mamaca mai na veimataqali vatu talei kei na yaubula ka maroroya tu na Kalou ena vukuda na Kawa I Taukei, me na vakacicivi kina na Matanitu Vanua kei Viti. Na Lotu kei na Matanitu me rau qai moici kina I vakarau ni bula vakaitaukei dina kei Viti.
DURI CAKE MAI O LOGANIUA
SA VURA O VERETI MAI BUA
NA VUNIVOLA NI NODA VANUA
ME SOLIA NAI VOLA VUKAVUKA
ME VAKASITABATAKI NA TUTUNA
KENA WAQA AU SA MAI BASUKA
ME VOLAI KINA NA KA E VUQA
SA LEKALEKA WALE NA GAUNA
NA MATANITU, NA LOTU, NA BULA
SO TALE AU SEGA NI TUKUNA
ME QAI MACALA VAKAMALUA
NI MAI ROGOCA LEWA OQORI
NOQU OTA SA TABU NI SOGOTI
SA DOLA MEI VAKAOTIOTI
SA ROBOTA TU NA KOLONI
8. E na kuretaki Viti na uneune ni veisau. Sa vakasuka e Viti o vuravura, ni kena vakacaberi na gauna oqo e na vakasuka o vuravura mai vei Viti. E na qai liutaki Viti ga nai Taukei dina kei Viti, ka na qai basika na koula e ra binibini vakauma.
MOCELUTU I LOMANI VESIKULA
SA YAVAVALA MAI NA VANUA
ME SAINI O VATU NI URAURA
SA OTI NA GAUNA KEI VURAVURA
SA DOLAVI NA NODA GAUNA
KABI KI NA WAVU NA SEDE KOULA
NA MANUWA LEVU TAUDUA I NA VURAVURA
VULAGI ME RA VODO VAKUSAKUSA
ME SOLI NA TIKITE VAKADUA
SA VURA TU NA QASE ULU VULA
AU DRUKA E NA UMA NI KOULA
E RAVITA NA TUTUNA RUARUA
SA VUKI SAUMAKI KI DAKUNA
9. Na gauna oqo e na kida mai me vaka na mataka. E na cabe mai na kena I Volasiga, ka na lutu na kena buto ka na qai cabe muria mai na Matanisiga. E ra kaya na vuku, “E dina ga ni dau lutu na buto ni bera ni kida na mataka. E na yaco na dui yaloyalo ni kawa bula kei Viti”. Sa mani koto e dua nai vakaro vei ira na tamata lomalomarua, o ya ni ra na vakawabokotaki e vuravura.
AU TIKO MAI NA VATU NI SAQA
NA GAUNA SA VUNI RARAMA
ME KUNE E VITI NA KALOUGATA
SA DOLA E VITI NA KATO NI CAKAMANA
AU SA RUI YALO KATAKATA
SA VO NOQU I VAKAMACALA
KO I AU NA QASE TAWA MACALA
MEU RAUNITAKI VITI MADA
NA KOULA SA VOTU E NA DELANA
KA SA SEGA NI VUNITAKI RAWA
AU CURU MAI VALE VULAVULA
SA DURI NA I TITOKO KOULA
TIKITE NI GAUNA AU SA TAURA
ME KUA SARA NA LOMALOMARUA
DE DUA E KAVORO NA ULUNA
10. Na mesaia ni kena vakabulai na Kawa I Taukei o ya na Vanua. Na vanua e dua na I vakarau ni bula ka ra veisola tu e loma na: - vosavosa, sulusulu, kotikoti, vuvale, veiwekani kei na bula vakaitaukei dina kei Viti. Sa mani vaqarai e dua na turaga ni valu me mai yadrava na veisau oqo, o ya mai na bula vakavavalagi kina bula vakaitaukei dina kei Viti. Sa mani nanumi me laki kerei mai na qase mai Nailega. Sa mani yaco yani na vakatadumata kina nona I tikotiko mai na Waqalabata ka kainaki mai ni yali ka sega ni macala se na yasa I vuravura cava e tiko kina. Sa mani vakauti vei iratou na tabana ni talevoni nai tukutuku ni kena vaqarai na turaga oqo. Me ratou qiri ena talevoni ena vei yasai vuravura, ka mani ciqomi mai Masaila mai Jamani ni tiko e na dua na vale taba lima ni vakadidike ni livaliva. Sa mani ciqoma na kerekere yani e Viti. Sa qai kauti ira mai e 5,415 na ovisa main a vei yasai vuravura me ra mai yadrava na veisautaki ni bula vakavavalagi kina bula vakaitaukei dina kei Viti.
TALIKARAVU AU VOSA KINA
AU VIA VOSA I MASAILA
TIKO E KERI O KOYA NA DRIKA
SA YALI YANI E NA VICA NA SIGA
E SAUMA NA VOSA O KOYA DINA
SA DURI TU E NA VALE TABA LIMA
KEI KOYA NOQU GONE NI IDIA
ME KUA NA NUINUI CALA KINA
E NA VUKU NI KATO NI LIVALIVA
MO DOLAVA, MO BASUKA, MO RAICA
LIMA NA UDOLU E VA E TINIKALIMA
NA OVISA AU MAI KAUTI IRA
ME LAKI YADRAVA NA PASIFIKA
VAKARAU DURI NA MESAIA
11. E toboki ka vesuki koso e dua nai tukutuku vuni. E toboka ka vakauta voli e dua na turaga na yacana o Misi Voreqe. Na bose vuni koya e caka vuni tiko e na loma ni Matanitu ka sa buki tiko kina e dua na vere ca o ya me ra sa vagalalataki nai Taukei ni Qele kei Viti ka me ra vakauti sara ki Rotuma. Me ra na qai taukena kece na dau ni bisinisi na veimataqali vatu talei e ra bini ka sura tu e na vanua ko Viti kei na I yaubula kece e ra tu e na loma ni qele kei na boto ni sauloa mai wasawasa.
MEU TUKUNA E DUA NA BOSE DUKA
O MISI VOREQE E MAI KAUTA (Commodore Voreqe Bainimarama)
O VITI ME LAUVANA VAKADUA
NA LEWENA ME RA BIU KI ROTUMA
ME TAURI RAWA KINA NA KOULA
SA SINAI NA NODA VANUA
NA MATANITU SA VAKAVUNA
OQO NA KA VUNI AU VIA TUKUNA
NI ROGOCA NA MALA NI NOQU VOSA
NI MASUTA NA KALOU KO JIOVA
ME SOLIA VEI KEDA NA LOLOMA
NA LEWA NI KALOU SA DOLA
12. Nai vakatakilakila ni gauna me na vakadinadinataka ko vuravura taucoko ni sa na cabe mai na gauna ni Kawa I Taukei e Viti. E rua mai nai vakatakilakila ni sa vakarau cabe na gauna oqo:
(1) E na levu sara na koula e na cabe e na veiyasai Viti.
(2) E na yaco e dua na dausiga levu sara e na veiyasai vuravura.
E na qai cabe cake na noda dela ni gauna na Kawa I Taukei. E da na qai liutaki Viti me yacova ni rusa na vuravura.
YADRA CALA NI CILA NA VULA
ME ROROGO TIKO NA DOMO NI UA
SOKO CAKE NA KOLA NI VURAVURA
RA USANA TU NA UMA NI KOULA
RA TALACA YANI E VEIVANUA
SAI KOYA NA DOLA NI GAUNA
AU TIKO E VALE NI BULI VEVA
KACIVAKI NI LUTU NA BOGILEKA
NA VEIMATANITU SA LEQA
E RA SA BIUTA TANI NA LUVEDRA
E NA VUKU NI KAKANA SA SEGA
ME TABAKI NA KENA NIUSIVEVA
ME KILA NA TUI NA NODRA LEQA
TUBU CAKE SA SEGA VEI KEDA
CAGI O VURAVURA I NA CEVA
VOSA CAKE MAI NA KAI TIMEKA
WARAKA NA GAUNA SA BERA
E NA OTI KINA NOMUNI LEQA
13. Ni sa oti na bose e ra sa mani gole vata kece na Vu kei Viti me ra laki moce ki Uluivuda, na nona vanua na gone turaga na Qiovula. Ni ra yadra e na mataka sa mani kaya o Tininilewa me ra laki moce ki Navosa me ra laki waraka kina na nona gauna e dua na turaga sucu vakatamata. Me na qai vakacabera ka vakadeitaka na gauna kei Viti e na ligana na Kawa I Taukei ka ni sa lumuti koya oti tu na Kalou ko Jiova.
SA BIU KO VATUNIURAURA
VOSA CAKE TU KO NAULUMATUA
ME RA SA CAVU YANI RA YAVUSA
ME RA LAKI MOCE KI ULUIVUDA
NA NONA VANUA NA QIOVULA
NODRA YADRA CAKE NI SA MATAKA
RA SA NA CABETA CAKE NA DELANA
VOSA CAKE O I TINI NI LEWA
ME DA LAKI MOCE KI NAVOSA
ME DA WARAKA NA GAUNA NEI SALABABA
14. Nai talanoa oqo e lako mai e na veivakadonui ni Kalou levu ko Jiova, ka mai vakadewataka na nodra turaga levu duadua na Kalou Vu kei na tamata, ka buli koya na Kalou me nona na Sau kei na Mana vakalou e tiko e Viti.
AU LUTU DRA KAU KUNE RAWA
TINAQU TU E DUA NA MARAMA
VALE ILOILO AU LAKI TAWANA
NOQU TIKO NA LOMANI MACAWA MEU I DEWADEWA
NI KALOU KINA BULA VAKATAMATA
AU KALOU VU KAU VOSA MANA
VEI VU KECE AU TAURA VATA
AU SA LEWAI IRA KECE SARA
LEWA NA VU KEI NA TAMATA
NA KALOU BULA E SOLIA RAWA
SA SAINITAKA KINA NA YACANA
NI MAI ROGOCA AU SA TUKUNA
SAI AU NA QASE ULUVULA
VODI VEI AU NA LAWA E VUQA
VODI TALEGA NA DAKAI NI VANUA
TIKO MAI CAKE NA KALOU BULA
KOI AU KA TIKO VOLI E RUKUNA
AU SA TAGANE KAU NABA DUA
NA VUCU OQO E A VAKADEWATAKA O MALELI MATAKULA (NO.1)




1 comment:

Anonymous said...

Au Lutudra Au kune rawa,Tinaqu tu e dua na marama,Vale iloilo au laki tawana,Noqu tiko na lomani macawa..Tinana e dua na marama,sega ni tukuni na tamana,qo e dua na luveni agilosi mai na vura2 makawa.Oti na waluvu ni ra yaco mai Viti na qase ra tawa vanua tiko mai,sa tiko oti yani eso na tamata lelevu balavu ka i gu levu,tukuni ni ra lako mai Vunilagi(se o Vuniivilevu or Davetalevu)ia gauna ya sa waicala oti kina o Vunilagi.Ira gona ya na luvei Lutudra se na Tui o Waicalanavanua no.1 sega ni mai tamadrau na Ciri.Qori no.2 e muri wale ga mai na lomanibai ni 1600-1700s..Lutudra qai mai biuti koya tale ni sa mamaca na vanua e na Pasifika na Kalou,noda vanua o Viti,ka cavuta vua "mo Tu riki eke".He was the progenitor of the giants existed on earth after the flood known also as the nephilims(plural).Remember those that dwelled in Canaan when the Israelite spies came to view the promised land.The single form and the root of the word(nephilims)in the Hebrew consonants is "npl" as found in Psalms 58:8.Here it means "miscarriage".In another context,however the word (nepel) or npl which is spelled identical but pronounced slightly different means "untimely birth" or abortion.They(nephilims) spread over the face of the earth when there was still a supercontinent after the flood and was divided during Pelegs time.Table of nations written by Stephen Oppenheimer mentioned Fiji as one of the Canaanites.But the nephilims were not found in any Biblical verses until the Israelite spies came to view their promised land which was Canaan.Accepting the theory that when the Canaanites dispersed to other nations as Genesis says,one of their ladies must have been the mother to Lutudras sons.